വിജയ് ബാബുവിനെതിരെ പരാതി ലഭിച്ചില്ലെന്ന് കമ്മീഷണര്‍
April 30 | 02:35 PM
കൊച്ചി: നടൻ വിജയ് ബാബുവിനെതിരെ രണ്ടാമത്തെ പരാതി ലഭിച്ചിട്ടില്ലെന്ന് കൊച്ചി സിറ്റി പൊലീസ് കമ്മീഷണര്‍.മുന്‍കൂര്‍ ജാമ്യാപേക്ഷ പരിഗണിക്കുന്നത് അറസ്റ്റിന് തടസമല്ലെന്നും സി എച്ച്‌ നാഗരാജു പറഞ്ഞു. വിജയ് ബാബുവിനെ തേടി വിദേശത്ത് ഇപ്പോൾ പോകാൻ തീരുമാനിച്ചിട്ടില്ല. പോകേണ്ട തീരുമാനം വന്നാല്‍ പോകും. ഹാജരാകണമെന്ന് അറിയിച്ച്‌ വീട്ടില്‍ നോട്ടീസ് നല്‍കിയിട്ടുണ്ട്. പ്രതി കീഴടങ്ങുമെന്നാണ് പ്രതീക്ഷ. അന്വേഷണത്തില്‍ കാലതാമസമുണ്ടായിട്ടില്ല. 22 ന് പരാതി ലഭിച്ചു. അന്ന് തന്നെ കേസെടുത്തുവെന്നും സി എച്ച്‌ നാഗരാജു മാധ്യമങ്ങളോട് പറഞ്ഞു.
പുതിയ മീ ടൂ ആരോപണത്തില്‍ കൊച്ചി സിറ്റി പൊലീസ് പരിശോധന തുടങ്ങിട്ടുണ്ട്. വുമണ്‍ എഗന്‍സ്റ്റ് സെക്ഷ്വല്‍ ഹരാസ്‌മെന്റ് പേജിലൂടെയാണ് അജ്ഞാതയായ യുവതി ഇന്നലെ രംഗത്തെത്തിയത്. ഇതാരെന്ന് കണ്ടെത്താന്‍ പ്രത്യേക സൈബര്‍ ടീമിനെ നിയോഗിച്ചിട്ടുണ്ട്. പേജിന്റെ അഡ്മിനെ കണ്ട് വിവരങ്ങള്‍ ശേഖരിക്കും. സിനിമാ മേഖലയില്‍ തന്നെയുള്ളയാളാണ് ഫേസ്ബുക്ക് പേജ് വഴി ആരോപണം ഉന്നയിച്ചതെന്നാണ് കരുതുന്നതെന്നും അദ്ദേഹം പറഞ്ഞു.
