വിഴിഞ്ഞം സമരം ചർച്ചയിലൂടെ ഒത്തുതീർപ്പാക്കണമെന്ന് ലത്തീൻ സഭ; പള്ളികളിൽ സർക്കുലർ വായിച്ചു
December 4 | 09:50 AM
തിരുവനന്തപുരം: വിഴിഞ്ഞം പദ്ധതി പ്രദേശത്തെ സമരം പരിഹരിക്കാൻ ചർച്ച വേണമെന്ന് ലത്തീൻ അതിരൂപത. സമവായത്തിലൂടെ പ്രശ്നങ്ങൾക്ക് പരിഹാരം കാണണം. ഉന്നയിച്ച 7 ആവശ്യങ്ങൾ അനുഭാവപൂർവം പരിഗണിക്കണമെന്നും പളളികളിൽ സർക്കുലർ വായിച്ചു. കർദിനാൾ ബസേലിയോസ് മാർ ക്ലീമിസിന്റെ നേതൃത്വത്തിൽ നടത്തുന്ന അനുനയ ശ്രമങ്ങളെ സഭ പ്രതീക്ഷയോടെയാണ് നോക്കി കാണുന്നത്. വിഴിഞ്ഞം തുറമുഖ സമരത്തിൽ സർക്കാരും സമവായം തേടുന്നുണ്ട്. പോലീസ് സ്റ്റേഷൻ അക്രമം നടന്ന് ഒരാഴ്ച പിന്നിടുമ്പോൾ ഒരു അറസ്റ്റ് ഒഴികെ മറ്റ് നടപടിയിലേക്ക് ഇതുവരെ പോലീസ് കടന്നിട്ടില്ല. കേന്ദ്രസേനയെ വിന്യസിക്കുന്ന കാര്യത്തിൽ കോടതി തീരുമാനമെടുക്കട്ടെ എന്ന നിലപാടിലാണ് സംസ്ഥാന സർക്കാർ. ഇക്കാര്യത്തിൽ കേന്ദ്രവും സംസ്ഥാനവും ആശയവിനിമയം നടത്തി തീരുമാനമെടുക്കാമെന്ന് കോടതി നിർദേശിച്ചിരുന്നു.