രാഹുൽ ഗാന്ധി വയനാട്ടിൽ; വിവിധ പരിപാടികളിൽ പങ്കെടുക്കും, ഇന്ന് ഡൽഹിക്ക് മടങ്ങും
February 13 | 10:36 AM
വയനാട്: ഭാരത് ജോഡോ യാത്രയ്ക്ക് ശേഷം ആദ്യമായി രാഹുൽ ഗാന്ധി തന്റെ സ്വന്തം മണ്ഡലമായ വയനാട്ടിലെത്തി. ഞായറാഴ്ച ഡൽഹിയിൽ നിന്നുള്ള ഇൻഡിഗോ വിമാനത്തിൽ കരിപ്പൂരിലെത്തിയ രാഹുൽ ഗാന്ധി രാത്രി തന്നെ കൽപ്പറ്റയിലെത്തി. മുതിർന്ന നേതാക്കളും ജില്ലയുടെ വിവിധ ഭാഗങ്ങളിൽ നിന്നെത്തിയ നിരവധി പ്രവർത്തകരും ചേർന്നാണ് രാഹുലിനെ കരിപ്പൂരിൽ സ്വീകരിച്ചത്. വയനാട് ജില്ലയിലെ വിവിധ പരിപാടികളിൽ പങ്കെടുത്ത ശേഷം ഇന്ന് രാത്രി ഡൽഹിക്ക് മടങ്ങും. കൈതാങ്ങ് പദ്ധതിയിൽ നിർമ്മിച്ച കൽപ്പറ്റ മണിയങ്കോട്ടെ വീട് സന്ദർശിക്കുന്നതോടെയാണ് ഇന്നത്തെ പരിപാടികൾക്ക് തുടക്കമാവുന്നത്. കളക്ട്രേറ്റിൽ നടക്കുന്ന യോഗങ്ങളിൽ അദ്ദേഹം പങ്കെടുക്കും. വയനാട്ടിൽ കടുവയുടെ ആക്രമണത്തിൽ കൊല്ലപ്പെട്ട കർഷകൻ പുതുശ്ശേരി തോമസിന്റെ വീടും രാഹുൽ ഗാന്ധി സന്ദർശിക്കും. വൈകിട്ട് മീനങ്ങാടി സ്റ്റേഡിയത്തിൽ നടക്കുന്ന പൊതുസമ്മേളനത്തിൽ പങ്കെടുക്കും. കോൺഗ്രസിന്റെ 'കൈത്താങ്ങ് ' പദ്ധതി പ്രകാരം നിർമ്മിച്ച 25 വീടുകളുടെ താക്കോൽ ദാനവും ചടങ്ങിൽ രാഹുൽ ഗാന്ധി നിർവഹിക്കും. രാത്രി 8.50 നുളള വിമാനത്തിലാണ് കരിപ്പൂരിൽ നിന്ന് രാഹുൽ ഗാന്ധി ഡൽഹിയിലേക്ക് മടങ്ങുക.