മുസ്ലീം ലീഗിന് ആരുടെയും ക്ഷണം ആവശ്യമില്ലെന്ന് ശിഹാബ് തങ്ങള്
December 10 | 03:21 PM
മലപ്പുറം: മുസ്ലീം ലീഗ് വര്ഗീയ പാര്ട്ടിയല്ലെന്ന സിപിഐഎം സംസ്ഥാന സെക്രട്ടറി എം.വി ഗോവിന്ദന്റെ പ്രസ്താവനയിൽ പ്രതികരണവുമായി സാദിഖലി ശിഹാബ് തങ്ങള്. മുസ്ലീം ലീഗിന് ആരുടെയും ക്ഷണം ആവശ്യമില്ലെന്ന് ശിഹാബ് തങ്ങള് നിലപാട് വ്യക്തമാക്കി. ലീഗ് ഇപ്പോള് യുഡിഎഫിന്റെ അവിഭാജ്യ ഘടകമാണ്. ലീഗ് വര്ഗീയ പാര്ട്ടിയല്ലെന്ന് തെളിയിക്കപ്പെട്ട വസ്തുതയാണ്. ഗോവിന്ദന് മാഷ് ഒരു സത്യം പറഞ്ഞു. അത്രയേ ഉള്ളൂ. ലീഗ് ഒരു മതേതര പാര്ട്ടിയാണെന്ന് ലീഗിന്റെ പ്രവര്ത്തനങ്ങള് വിലയിരുത്തുന്ന ആര്ക്കും മനസിലാകും. ന്യൂനപക്ഷങ്ങള്ക്കും പൊതുസമൂഹത്തിനും വേണ്ടിയാണ് ലീഗ് പ്രവര്ത്തിക്കുന്നത്. മതേതരത്വം, മതസൗഹാര്ദം, ജനാധിപത്യം എന്നിവ ശക്തിപ്പെടുത്തുന്നതാണ് ലീഗിന്റെ പ്രവര്ത്തന രീതികള്. അത് മനസിലായവര് കാര്യങ്ങള് ഇപ്പോള് തുറന്നുപറഞ്ഞെന്നേയുള്ളൂ. സാദിഖലി ശിഹാബ് തങ്ങള് വ്യക്തമാക്കി. അതേസമയം ലീഗിനെ എല്ഡിഎഫിലേക്ക് ക്ഷണിച്ചിട്ടില്ലെന്നാണ് സിപിഐഎം സംസ്ഥാന നേതൃത്വത്തിൻ്റെ പ്രതികരണം.