ജനങ്ങളുമായുള്ള ബന്ധം ശക്തിപ്പെടുത്തും; ജോഡോ യാത്രയെ പ്രശംസിച്ച് സിപിഎം കേന്ദ്ര കമ്മിറ്റി
November 17 | 11:03 AM
ഡൽഹി: രാഹുല് ഗാന്ധി നയിക്കുന്ന ഭാരത് ജോഡോ യാത്രയെ പ്രശംസിച്ച് സിപിഐഎം. ജനങ്ങളുമായുള്ള ബന്ധം ശക്തിപ്പെടുത്താന് യാത്രയ്ക്ക് കഴിയുമെന്നാണ് സിപിഐഎം കേന്ദ്ര കമ്മിറ്റി റിപ്പോര്ട്ടിലെ പരാമര്ശം. കോണ്ഗ്രസിനെ ഏകീകരിക്കാനും രക്ഷിക്കാനുമുള്ള ശ്രമമാണ് ഭാരത് ജോഡോ യാത്രയെന്നും റിപ്പോര്ട്ട് പറയുന്നു. ദക്ഷിണേന്ത്യന് സംസ്ഥാനങ്ങളില് ഭാരത് ജോഡോ യാത്രയ്ക്ക് ജനങ്ങളില് നിന്ന് മികച്ച പ്രതികരണം ലഭിച്ചെന്നും റിപ്പോര്ട്ടിലുണ്ട്.
ഭാരത് ജോഡോ യാത്ര കേരളത്തിലൂടെ കടന്നുപോയപ്പോള് പോളിറ്റ് ബ്യൂറോ അംഗങ്ങള് ഉള്പ്പെടെ യാത്രയെ വിമര്ശിക്കുകയും പരിഹസിക്കുകയും ചെയ്തിരുന്നു. എന്നാൽ കേരള നേതാക്കളുടെ വിമർശനങ്ങളൊന്നും കേന്ദ്ര കമ്മിറ്റി റിപ്പോർട്ടിലില്ലെന്നതാണ് ശ്രദ്ധേയം.