ലോക കപ്പ് ഫുട്ബോള് വിളംബര റാലി വെള്ളിയാഴ്ച;പി ആർ ഡി അറിയിപ്പുകൾ
November 18 | 06:05 AM
ലോക കപ്പ് ഫുട്ബോള് വിളംബര റാലി വെള്ളിയാഴ്ച
ജില്ലാപഞ്ചായത്ത്,ജില്ലാ സ്പോര്ട്സ് കൗണ്സില്,യുവജന ക്ഷേമ ബോര്ഡ് എന്നിവയുടെ സംയുക്താഭിമുഖ്യത്തില്സംഘടിപ്പിക്കുന്ന വേൾഡ് കപ്പ് ഫാൻസ് ഫെസ്റ്റ് വിളംബര റാലി നവംബർ 18ന് ഉച്ചക്ക് മൂന്നിന് കണ്ണൂർ നഗരത്തിൽ നടക്കും. ജവഹർ സ്റ്റേഡിയത്തിൽ നിന്ന് ആരംഭിക്കും. വിവിധ രാജ്യങ്ങളുടെ ഫാന്സുകള് അണിനിരക്കും.
ലോകകപ്പ് ഫുട്ബോളിനെ ആവേശത്തോടെ വരവേറ്റ് അഴീക്കോട്
വലയിലേക്ക് കുതിച്ച ഓരോ പന്തും ഹർഷാരവങ്ങളോടെ കാണികൾ വരവേറ്റപ്പോൾ അത് കാൽപ്പന്തു കളിയുടെ വിശ്വ മാമാങ്കത്തിനുള്ള വരവേൽപ്പായി. ലോകകപ്പ് ഫുട്ബോളിനെ വരവേൽക്കുന്നതിനായി അഴീക്കോട് മണ്ഡലത്തിൽ സംഘടിപ്പിച്ച സോക്കർ ഫെസ്റ്റ് ആരാധകർക്ക് ആവേശ കളിയാട്ടത്തിന്റെ തുടക്കമായി. ആദ്യ ഗോളടിച്ച് ഫുട്ബോൾ താരം സി കെ വിനീത് ഫെസ്റ്റ് ഉദ്ഘാടനം ചെയ്തു. ലോകകപ്പ് ആരംഭിക്കുന്നതിനു മുന്നോടിയായി 5000 ഗോളുകളാണ് ഫെസ്റ്റിന്റെ ലക്ഷ്യം. ഇതിനായി വൻകുളത്ത് വയൽ ജംഗ്ഷനിൽ ഗോൾപോസ്റ്റ് ഒരുക്കിയിട്ടുണ്ട്. വിദ്യാർത്ഥികൾക്കും പൊതുജനങ്ങൾക്കും ഫെസ്റ്റിൽ പങ്കാളികളാകാം. പരിപാടിയുടെ ഭാഗമായി പൊതുജന റാലിയും സംഘടിപ്പിച്ചു.
വൻകുളത്ത് വയലിൽ നടന്ന പരിപാടിയിൽ കെ വി സുമേഷ് എംഎൽഎ അധ്യക്ഷത വഹിച്ചു. കണ്ണൂർ ബ്ലോക്ക് പഞ്ചായത്ത് പ്രസിഡണ്ട് കെ സി ജിഷ, അഴീക്കോട് പഞ്ചായത്ത് പ്രസിഡണ്ട് കെ അജീഷ്, ചിറക്കൽ പഞ്ചായത്ത് പ്രസിഡണ്ട് പി ശ്രുതി, മുൻ ഇന്ത്യൻ ഫുട്ബോൾ താരം ബിനീഷ് കിരൺ, സംസ്ഥാന സ്പോർട്സ് കൗൺസിൽ വൈസ് പ്രസിഡണ്ട് ഒ കെ വിനീഷ്, മുൻ എൻഎസ്ജി കാമാൻ്റൊ ശൗര്യ ചക്ര പി വി മനേഷ്, ടെലിവിഷൻ താരം രാജ് കലേഷ്, എസിപി രത്നകുമാർ എന്നിവർ പങ്കെടുത്തു.
ബ്രസീൽ അർജന്റീന സൗഹൃദ ഫുട്ബോൾ മാച്ച് 18ന് പയ്യാമ്പലം ബേ ക്ലബിൽ
ലോകകപ്പ് ഫുട്ബോളിന്റെ ഭാഗമായി കണ്ണൂർ ജില്ലാ സ്പോർട്സ് കൗൺസിലിന്റെയും ജില്ലാ യുവജനക്ഷേമ ബോർഡിന്റെയും ആഭിമുഖ്യത്തിൽ
ജനപ്രതിനിധികളും പത്രപ്രവർത്തകരും മുൻ കാല ഫുട്ബോൾ കളിക്കാരും സിനിമാ താരങ്ങളും സ്പോർട്സ് കൗൺസിൽ ഭാരവാഹികളും അണിനിരക്കുന്ന ബ്രസീൽ അർജന്റീന ഫുട്ബോൾ സൗഹൃദ മത്സരം നവംബർ 18 ന് വൈകുന്നേരം 6 മണിക്ക് പയ്യാമ്പലം ബേ ക്ലബ് ഫുട്ബോൾ ടർഫിൽ വച്ച് നടക്കും. എംപിമാരായ ഡോ. വി ശിവദാസൻ , അഡ്വ. പി സന്തോഷ് കുമാർ, എം എൽ എ മാരായ രാമചന്ദ്രൻ കടന്നപ്പള്ളി, കെ.വി സുമേഷ് , എം.വിജിൻ , സിനിമാ താരം
സന്തോഷ് കീഴാറ്റൂർ ,മുൻ ഇന്ത്യൻ ഗോൾകീപ്പർ കെ.ശിവദാസ്, മുൻ ഇന്ത്യൻ ഫുട്ബോൾ താരം സി.കെ. വിനീത്, സന്തോഷ് ട്രോഫി കേരള ടീം മുൻ ക്യാപ്റ്റൻ ബിനീഷ് കിരൺ, കേരള സ്റ്റേറ്റ് സ്പോർട്സ് കൗൺസിൽ വൈസ് പ്രസിഡന്റ് ഒ.കെ. വിനീഷ് , പത്ര-ദൃശ്യ മാധ്യമരംഗത്തെയും, കായിക-സാംസ്കാരിക രംഗത്തെയും പ്രമുഖർ പരിപാടിയിൽ പങ്കാളികളാവും.
ഉദ്ഘാടനം മാറ്റിവെച്ചു
നവംബർ 18 വെള്ളിയാഴ്ച കണ്ണൂർ സർവകലാശാലയിൽ നടത്താൻ നിശ്ചയിച്ചിരുന്ന പ്രധാന പ്രവേശന കവാടത്തിൻ്റെയും സംയോജിത ബിരുദാനന്തര ബിരുദ പ്രോഗ്രാമിൻ്റെയും ഉദ്ഘാടനം മാറ്റിവെച്ചു. പുതുക്കിയ തീയ്യതി പിന്നീട് അറിയിക്കും.
അപേക്ഷ ക്ഷണിച്ചു
രാജ്മോഹൻ ഉണ്ണിത്താൻ എംപിയുടെ 2022-23 വർഷത്തെ പ്രാദേശിക വികസന നിധിയിൽ ഉൾപ്പെടുത്തി ഭിന്നശേഷിയുള്ള ഒരാൾക്ക് ഇലക്ട്രോണിക്ക്/ഇലക്ട്രിക്കൽ വീൽചെയറും, മറ്റൊരു ഭിന്നശേഷിയുള്ള ആൾക്ക് സൈഡ് വീലോടുകൂടിയ സ്കൂട്ടറും നൽകുന്നതിന് പയ്യന്നൂർ മുനിസിപ്പാലിറ്റിയിലെ വാർഡ് 10 കാനായി നോർത്തിലെ മുത്തത്തി കാര്യക്കാട്ടെ 40% ശതമാനമോ അതിൽ കൂടുതലോ വൈകല്യമുള്ള ഭിന്നശേഷിക്കാരിൽ നിന്നും അപേക്ഷ ക്ഷണിച്ചു.
കെ. സുധാകരൻ എംപിയുടെ 2022-23 വർഷത്തെ പ്രാദേശിക വികസന നിധിയിൽ ഉൾപ്പെടുത്തി ഒരു ഭിന്നശേഷിക്കാരന് സൈഡ് വീലോടുകൂടിയ സ്കൂട്ടർ നൽകുന്നതിന് പെരളശ്ശേരി ഗ്രാമപഞ്ചായത്തിൽ വാർഡ് മൂന്നിലെ 40% ശതമാനമോ അതിൽ കൂടുതലോ വൈകല്യമുള്ള ഭിന്നശേഷിക്കാരിൽ നിന്നും അപേക്ഷ ക്ഷണിച്ചു.
എഴുതി തയ്യാറാക്കിയ അപേക്ഷകൾ ഭിന്നശേഷി സർട്ടിഫിക്കറ്റ്, വരുമാന സർട്ടിഫിക്കറ്റ്, റേഷൻകാർഡ്, ആധാർ കാർഡ് എന്നിവയുടെ സാക്ഷ്യപ്പെടുത്തിയ പകർപ്പ് സഹിതം സമർപ്പിക്കുക.അപേക്ഷ കണ്ണൂർ ജില്ലാ സാമൂഹ്യ നീതി ഓഫീസിൽ നവംബർ 23ന് വൈകീട്ട് അഞ്ച് വരെ സ്വീകരിക്കും. ഫോൺ: 8281999015, 0497 2997811
ന്യൂനപക്ഷ കമ്മീഷൻ സിറ്റിങ് 19ന്
സംസ്ഥാന ന്യൂനപക്ഷ കമ്മീഷൻ കണ്ണൂർ-കാസർകോട് ജില്ലാതല സിറ്റിങ് നവംബർ 19 ശനി രാവിലെ 11 മണിക്ക് കലക്ടറേറ്റ് കോൺഫറൻസ് ഹാളിൽ നടക്കും. കണ്ണൂർ, കാസർകോട് ജില്ലകളിലെ പരാതികൾ പരിഗണിക്കുകയും പുതിയവ സ്വീകരിക്കുകയും ചെയ്യും.
കേരളോത്സവം സംഘാടക സമിതി രൂപീകരണം 21ന്
സംസ്ഥാന യുവജനക്ഷേമ ബോർഡും ജില്ലാ പഞ്ചായത്തും സംയുക്തമായി സംഘടിപ്പിക്കുന്ന ജില്ലാ കേരളോത്സവത്തിന്റെ സംഘാടക സമിതി രൂപീകരണ യോഗം നവംബർ 21ന് വൈകീട്ട് 4.30ന് മുഴപ്പിലങ്ങാട് കമ്മ്യൂണിറ്റി ഹാളിൽ നടക്കും.
ലെവൽക്രോസ് അടച്ചിടും
താവം-ദാലിൽ റോഡിൽ കണ്ണപുരം-പഴയങ്ങാടി സ്റ്റേഷനുകൾക്കിടയിലുള്ള 256-ാം നമ്പർ ലെവൽക്രോസ് നവംബർ 20ന് രാവിലെ എട്ട് മുതൽ 29ന് രാത്രി എട്ട് മണി വരെ അറ്റകുറ്റപ്പണികൾക്കായി അടച്ചിടുമെന്ന് സതേൺ റെയിൽവെ അസിസ്റ്റന്റ് ഡിവിഷണൽ എഞ്ചിനീയർ അറിയിച്ചു.
ഇ-ടെണ്ടർ
ജില്ലാ ആശുപത്രിയുടെ കാത്ത് ലാബിലേക്ക് 2023 ജനുവരി ഒന്നു മുതൽ 2023 ഡിസംബർ 31 വരെ ആവശ്യമായ വിവിധതരം കൺസ്യൂമബിൾസ്, ഹാർഡ് വെയേഴ്സ് എന്നിവ വിതരണം ചെയ്യാൻ www.etenders.kerala.gov.in വഴി ഇ ടെണ്ടർ ക്ഷണിച്ചു. ഡിസംബർ മൂന്നിന് വൈകീട്ട് അഞ്ച് മണി വരെ ടെണ്ടർ സമർപ്പിക്കാം.
വീഡിയോ എഡിറ്റിങ് കോഴ്സ്
കേരള മീഡിയ അക്കാദമി കൊച്ചി സെന്ററിൽ ഡിസംബറിൽ തുടങ്ങുന്ന വീഡിയോ എഡിറ്റിങ് സർട്ടിഫിക്കറ്റ് കോഴ്സിന് നവംബർ 25 വരെ അപേക്ഷിക്കാം. അപേക്ഷകൾ keralamediaacademy.org എന്ന വെബ്സൈറ്റിലൂടെ സമർപ്പിക്കണം. കോഴ്സ് കാലാവധി ആറ് മാസം. യോഗ്യത: പ്ലസ് ടു. പട്ടികജാതി/പട്ടികവർഗ/ഒ ഇ സി വിദ്യാർഥികൾക്ക് ഫീസ് ആനുകൂല്യം. അപേക്ഷാ ഫീസ് 300 രൂപ (പട്ടികജാതി, പട്ടികവർഗ, ഒ ഇ സി വിഭാഗക്കാർക്ക് 150 രൂപ) ഇ-ട്രാൻസ്ഫർ/ബാങ്ക് മുഖേന അടച്ച രേഖയും സർട്ടിഫിക്കറ്റുകളുടെ പകർപ്പും അപേക്ഷയോടൊപ്പം അപ്ലോഡ് ചെയ്യണം. ഫോൺ: 0484 2422275, 9447607073.
ഫയർമാൻ കായിക ക്ഷമതാ പരീക്ഷ
ഫയർ ആൻഡ് റെസ്ക്യൂ സർവീസിലെ ഫയർമാൻ (ട്രെയിനി-139/2019), ഫയർമാൻ(ട്രെയിനി-എൻ സി എ- എസ് സി സി സി-359/2019) തസ്തികയിലേക്കുള്ള തെരഞ്ഞെടുപ്പിനായി യഥാക്രമം 2022 ആഗസറ്റ് 19, ജൂലൈ 15 തീയതികളിൽ പ്രസിദ്ധീകരിച്ച ചുരുക്കപ്പട്ടികകളിൽ ഉൾപ്പെട്ട കോഴിക്കോട്, മലപ്പുറം, വയനാട്, കണ്ണൂർ, കാസർകോട് ജില്ലകളിലുള്ള ഉദ്യോഗാർഥികൾക്കുള്ള ശാരീരിക അളവെടുപ്പും കായികക്ഷമതാ പരീക്ഷയും കോഴിക്കോട് പൂവാട്ടുപറമ്പ് പെരുവയൽ സെന്റ് സേവിയേഴ്സ് എൽ പി ആൻഡ് യു പി സ്കൂൾ ഗ്രൗണ്ടിൽ നവംബർ 28, 29, 30, ഡിസംബർ ഒന്ന്, രണ്ട്, അഞ്ച്, ആറ്, ഏഴ്, എട്ട്, ഒമ്പത് തീയതികളിലും കോഴിക്കോട് ഈസ്റ്റ് ഹിൽ ഗവ.കോളേജ് ഓഫ് ഫിസിക്കൽ എജുക്കേഷൻ ഗ്രൗണ്ടിൽ ഡിസംബർ രണ്ട്, മൂന്ന്, അഞ്ച്, ആറ്, ഏഴ്, എട്ട്, ഒമ്പത് തീയതികളിലും രാവിലെ ആറ് മണി മുതൽ നടത്തും. ഉദ്യോഗാർഥികൾ അഡ്മിഷൻ ടിക്കറ്റ് പ്രൊഫൈലിൽ നിന്നും ഡൗൺലോഡ് ചെയ്ത് കമ്മീഷൻ അംഗീകരിച്ച തിരിച്ചറിയൽ കാർഡിന്റെ അസ്സൽ സഹിതം പരീക്ഷ കേന്ദ്രത്തിൽ എത്തണം.
45 ദിവസത്തേക്ക് ഗതാഗതം നിരോധിച്ചു
മാങ്ങാട്ടിടം ഗ്രാമപഞ്ചായത്തിലെ മൂന്നാംപീടിക-കണ്ടേരി-മാണിക്കോത്ത് വയൽ റോഡിൽ മാങ്ങാട്ടിടം പി എച്ച് സി മുതൽ വട്ടിപ്രം തായ്പരദേവത ക്ഷേത്രം വരെ പ്രവൃത്തി നടക്കുന്നതിനാൽ നവംബർ 18 മുതൽ 45 ദിവസത്തേക്ക് ഇതുവഴിയുള്ള ഗതാഗതം നിരോധിച്ചതായി പി ഐ യു എക്സിക്യൂട്ടീവ് എഞ്ചിനീയർ അറിയിച്ചു.
വാഹനഗതാഗതം നിരോധിച്ചു
തൃപ്പങ്ങോട്ടൂർ, കുന്നോത്തുപറമ്പ് ഗ്രാമപഞ്ചായത്തുകളിലെ കല്ലുവളപ്പ്-പാത്തിക്കൽ റോഡ് പ്രവൃത്തി നടക്കുന്നതിനാൽ നവംബർ 20 മുതൽ 30 വരെ ഇതുവഴിയുള്ള വാഹനഗതാഗതം നിരോധിച്ചതായി പി ഐ യു എക്സിക്യൂട്ടീവ് എഞ്ചിനീയർ അറിയച്ചു.
ഫിഷറി ഗാർഡ് നിയമനം
അഞ്ചരക്കണ്ടി പുഴയിൽ ജല ആവാസ വ്യവസ്ഥയിൽ സമഗ്ര മത്സ്യസംരക്ഷണം പദ്ധതി 2022-25 ഫീൽഡ്തല പ്രവർത്തനങ്ങൾക്കായി താൽക്കാലികാടിസ്ഥാനത്തിൽ ഫിഷറി ഗാർഡുകളെ നിയമിക്കുന്നു. വി എച്ച് എസ് ഇ ഫിഷറീസ് സയൻസ്/എച്ച് എസ് ഇ, സ്രാങ്ക് ലൈസൻസ് എന്നിവയാണ് യോഗ്യത. മത്സ്യത്തൊഴിലാളി കുടുംബത്തിലുള്ളവർക്ക് മുൻഗണന.
താൽപര്യമുള്ള ഉദ്യോഗാർഥികൾ ബയോഡാറ്റയും യോഗ്യത തെളിയിക്കുന്ന സർട്ടിഫിക്കറ്റുകളുടെ അസ്സലും പകർപ്പും സഹിതം മാപ്പിള ബേയിലെ ഫിഷറീസ് ഡെപ്യൂട്ടി ഡയറക്ടറുടെ കാര്യാലയത്തിൽ നവംബർ 23ന് രാവിലെ 11 മണിക്ക് വാക്ക് ഇൻ ഇന്റർവ്യൂവിന് ഹാജരാകണം. ഫോൺ: 0497 2731081.
മൈക്രോ ഫിനാൻസ് വായ്പ
സംസ്ഥാന പട്ടികജാതി പട്ടികവർഗ വികസന കോർപ്പറേഷൻ സംസ്ഥാന കുടുംബശ്രീ മിഷനുനായി ചേർന്ന് നടപ്പാക്കുന്ന വനിതാ ശാക്തീകരണ പദ്ധതിയിൽ 'മൈക്രോ ഫിനാൻസ് വായ്പ' നൽകുന്നതിന് കുടുംബശ്രീയിൽ രജിസ്റ്റർ ചെയ്ത അയൽക്കൂട്ടങ്ങളിൽ നിന്നും അപേക്ഷ ക്ഷണിച്ചു. അപേക്ഷകർ കുടുംബശ്രീയുടെ ഗ്രേഡിംഗ് ലഭിച്ച പട്ടികജാതി വനിതകളുടെ അയൽക്കൂട്ടങ്ങൾ ആയിരിക്കണം. ഒരു അയൽക്കൂട്ടത്തിന് പരമാവധി അഞ്ച് ലക്ഷം രൂപ വരെയാണ് വായ്പ. അംഗങ്ങളുടെ പ്രായപരിധി 18നും 55നും ഇടയിൽ ആയിരിക്കണം. കുടുംബ വാർഷിക വരുമാനം മൂന്ന് ലക്ഷം രൂപയിൽ കവിയരുത്. വായ്പാ പലിശ നിരക്ക് അഞ്ച് ശതമാനവും തിരിച്ചടവ് കാലയളവ് മൂന്ന് വർഷവുമാണ്. വിശദ വിവരത്തിനും അപേക്ഷാ ഫോറത്തിനും കോർപ്പറേഷന്റെ ജില്ലാ കാര്യാലയവുമായി ബന്ധപ്പെടുക. ഫോൺ: 04972705036.
പാനലിലേക്ക് അപേക്ഷിക്കാം
കണ്ണൂർ ഗവ. പോളിടെക്നിക് കോളേജ് ഇലക്ട്രിക്കൽ എഞ്ചിനീയറിംഗ് വിഭാഗത്തിൽ ഗസ്റ്റ് ലക്ചറർമാരെ നിയമിക്കാൻ പാനൽ തയ്യാറാക്കുന്നു. ഇലക്ട്രിക്കൽ എഞ്ചിനീയറിംഗിൽ ഫസ്റ്റ് ക്ലാസോടെ ബിടെക്/ബി ഇ ബിരുദമുള്ളവർക്ക് അപേക്ഷിക്കാം. താൽപര്യമുള്ളവർ ബയോഡാറ്റ, മാർക്ക്ലിസ്റ്റ്, യോഗ്യത, പ്രവൃത്തി പരിചയം എന്നിവ തെളിയിക്കുന്ന അസ്സൽ സർട്ടിഫിക്കറ്റുകൾ സഹിതം നവംബർ 21ന് രാവിലെ 10ന് കോളേജിൽ എഴുത്തു പരീക്ഷക്കും കൂടിക്കാഴ്ചക്കും ഹാജരാകണം. ഫോൺ: 0497 2835106
പാരമ്പര്യേതര ട്രസ്റ്റി നിയമനം
തളിപ്പറമ്പ് താലൂക്കിലെ പാടിക്കുറ്റി ശ്രീ മഹാദേവീ ക്ഷേത്രത്തിൽ പാരമ്പര്യേതര ട്രസ്റ്റിമാരെ നിയമിക്കാൻ അപേക്ഷ ക്ഷണിച്ചു. അപേക്ഷാഫോം മലബാർ ദേവസ്വം ബോർഡിന്റെ നീലേശ്വരത്തുള്ള അസി.കമ്മീഷണറുടെ ഓഫീസിലും തളിപ്പറമ്പ് ഇൻസ്പെക്ടറുടെ ഓഫീസിലും www.malabardevaswom.kerala.gov.in ലും ലഭിക്കും. പൂരിപ്പിച്ച അപേക്ഷ ഡിസംബർ 15ന് വൈകീട്ട് അഞ്ച് മണിക്കകം നീലേശ്വരത്തെ അസി. കമ്മീഷണറുടെ ഓഫീസിൽ ലഭിക്കണം.
ജലശക്തി അഭിയാൻ: യോഗം 23ന്
ജലശക്തി അഭിയാന്റെ ഭാഗമായി ജില്ലയുടെ ജല സംരക്ഷണ മാസ്റ്റർ പ്ലാൻ, ജല സ്രോതസ്സുകളുടെയും ജലസംരക്ഷണ പ്രവൃത്തികളുടെയും ജി ഐ എസ് മാപ്പ് എന്നിവ സംബന്ധിച്ച യോഗം നവംബർ 23ന് വൈകീട്ട് നാല് മണിക്ക് ജില്ലാ കലക്ടറുടെ ചേമ്പറിൽ ചേരും.
ഐ എം സി കോഴ്സുകൾ
കണ്ണൂർ ഗവ. ഐ ടി ഐയിൽ ഐ എം സി നടത്തുന്ന ഡിപ്ലോമ ഇൻ ക്വാളിറ്റി കൺട്രോൾ, ഡിപ്ലോമ ഇൻ ഓയിൽ ആന്റ് ഗ്യാസ് ടെക്നോളജി സൺഡേ ബാച്ച് കോഴ്സുകളിലേക്ക് അപേക്ഷ ക്ഷണിച്ചു. യോഗ്യത: എസ് എസ് എൽ സി/ പ്ലസ്ടു/വി എച്ച് എസ് ഇ/ഡിഗ്രി/ബി ടെക്. ഫോൺ: 8301098705
ഡെമോൺസ്ട്രേറ്റർ നിയമനം
കണ്ണൂർ ഗവ. ഫുഡ് ക്രാഫ്റ്റ് ഇൻസ്റ്റിറ്റ്യൂട്ടിൽ ഫുഡ് പ്രൊഡക്ഷൻ വിഭാഗത്തിൽ താൽക്കാലിക ഡെമോൺസ്ട്രേറ്ററെ നിയമിക്കുന്നു. യോഗ്യത: അംഗീകൃത മൂന്ന് വർഷ ഹോട്ടൽ മാനേജ്മെന്റ് ഡിപ്ലോമ/ഡിഗ്രിയും രണ്ട് വർഷത്തെ പ്രവൃത്തി പരിചയവും. അഭിമുഖം നവംബർ 21ന് രാവിലെ 10 മണിക്ക് ഇൻസ്റ്റിറ്റ്യൂട്ടിൽ. ഫോൺ: 0497 2706904, 9995025076.
മട്ടന്നൂർ കോളേജിൽ 'ബ്രസീലി'ന് വിജയം
മട്ടന്നൂർ പഴശ്ശിരാജ എൻഎസ്എസ് കോളേജിൽ കായിക വിഭാഗവും മാത്തമാറ്റിക്സ് വിഭാഗവും സംയുക്തമായി ലോകകപ്പിനെ വരവേൽക്കുന്നതിന്റെ ഭാഗമായി സംഘടിപ്പിച്ച പെനാൽട്ടി ഷൂട്ടൗട്ട് മത്സരത്തിൽ 'ബ്രസീൽ' ടീം ഒന്നാം സ്ഥാനവും 'അർജൻറീന' ടീം രണ്ടാം സ്ഥാനവും നേടി. കോളേജ് പ്രിൻസിപ്പൽ ഡോ. നന്ത്യത്ത് ഗോപാലകൃഷ്ണൻ ഉദ്ഘാടനം ചെയ്തു. മാത്തമാറ്റിക്സ് വിഭാഗം മേധാവി ഡോ. ഉഷ, കായിക വിഭാഗം മേധാവി ശ്രീ. അഖിൽ കെ ശ്രീധർ വിദ്യാർത്ഥികളായ നവജ്യോത്, ആവന്തി എന്നിവർ പരിപാടിക്ക് നേതൃത്വം നൽകി.
മാങ്ങാട്ടിടത്തെ കുഞ്ഞിളം കൃഷിത്തോട്ടങ്ങൾ
അക്ഷരമാലകൾക്കും പാട്ടിനും കഥകൾക്കുമൊപ്പം കൃഷിപാഠവും പഠിക്കുകയാണ് മാങ്ങാട്ടിടം പഞ്ചായത്തിലെ അങ്കണവാടി കുട്ടികൾ. ഗ്രാമപഞ്ചായത്ത്, കൃഷിഭവൻ, വനിത ശിശു വികസന വകുപ്പ്, കൂത്തുപറമ്പ് ഐ സി ഡി എസ് എന്നിവ ചേർന്ന് അങ്കണവാടികളിൽ ആരംഭിച്ച 'കുഞ്ഞിളം കൃഷിത്തോട്ടം' പദ്ധതിയാണ് കൃഷിയറിവ് പകരുന്നത്.
കുട്ടികളിൽ കൃഷിയോടുള്ള താൽപര്യം വളർത്തിയെടുക്കുക, ജൈവ കൃഷി രീതികൾ വ്യാപിപ്പിക്കുക എന്നീ ലക്ഷ്യങ്ങളോടെയാണ് പഞ്ചായത്തിലെ 34 അങ്കണവാടികളിൽ ശിശു സൗഹൃദ പച്ചക്കറി കൃഷി പദ്ധതി ആരംഭിച്ചത്. അങ്കണവാടി കുട്ടികളുടെ ഭക്ഷണത്തിനായി വിഷരഹിത പച്ചക്കറികൾ ലഭ്യമാക്കാനും ഇതിലൂടെ ലക്ഷ്യമിടുന്നു. 350 കുട്ടികൾക്ക് കൃഷിഭവൻ ആദ്യഘട്ടത്തിൽ പച്ചക്കറി തൈകൾ നൽകും. ഒരു കുട്ടിക്ക് ഒരു തൈ എന്ന തോതിലാണ് വിതരണം ചെയ്യുക. ഇതിൽ നിന്നും മികച്ച രീതിയിൽ പരിപാലനം നടത്തുന്ന മൂന്ന് കുട്ടികളെ കണ്ടെത്തി സമ്മാനം നൽകും. അങ്കണവാടികളിലെ കൃഷിക്ക് പുറമെ കുട്ടികളുടെ വീടുകളിലും കൃഷി വ്യാപിപ്പിക്കും. ഇതിനായുള്ള തൈകളും കൃഷിഭവൻ ലഭ്യമാക്കും. സമഗ്രമായ കാർഷിക മുന്നേറ്റത്തിന്റെ ഭാഗമായി എല്ലാവരിലും കാർഷിക അവബോധം സൃഷ്ടിക്കാനുള്ള ഇടപെടലാണ് ഇതിലൂടെ നടത്തുന്നതെന്ന് പഞ്ചായത്ത് പ്രസിഡണ്ട് പി സി ഗംഗാധരൻ മാസ്റ്റർ പറഞ്ഞു.
ദർഘാസ്
ന്യൂമാഹി മത്സ്യബന്ധന തുറമുഖത്തെ കാന്റീൻ ഒരു വർഷത്തേക്ക് നടത്തിപ്പിന് നൽകാൻ ദർഘാസ് ക്ഷണിച്ചു. നവംബർ 28 ഉച്ചക്ക് മൂന്ന് മണി വരെ ദർഘാസ് സ്വീകരിക്കും.
കണ്ണൂർ ഗവ. എഞ്ചിനീയറിംഗ് കോളേജ് മെയിൻ ബ്ലോക്കിന് കിഴക്ക് ഭാഗത്തുള്ള കാർ പോർച്ചിന് മേൽക്കൂര ഒരുക്കുന്ന പ്രവൃത്തി ചെയ്യാൻ സ്ഥാപനങ്ങളിൽ നിന്നും ദർഘാസുകൾ ക്ഷണിച്ചു. ദർഘാസ് സ്വീകരിക്കുന്ന അവസാന തീയതി ഡിസംബർ 22 വൈകീട്ട് മൂന്ന് മണി. ഫോൺ: 0497 2780226
വൈദ്യുതി മുടങ്ങും
കണ്ണൂർ സെക്ഷൻ പരിധിയിൽ നവംബർ 18 ന് രാവിലെ 7 മണി മുതൽ 2 മണി വരെ ധനലക്ഷ്മി ബേങ്ക്, ലക്ഷ്മണൻ കട, ഹോമിയോ ആശുപത്രി, മലബാർ, പുഴാതി ഹൗസിങ്ങ് കോളനി, താണ , കുട്ടി ബിൽഡിങ്ങ്, ആനയിടുക്ക് പള്ളി, ചന്ദ്രിക ഭാഗങ്ങളിൽ വൈദ്യുതി മുടങ്ങും.
ലൈനിൽ അറ്റകുറ്റ പണികൾ നടക്കുന്നതിനാൽ നവംബർ 18 ന് രാവിലെ 7 മണി മുതൽ വൈകുന്നേരം 3 മണി വരെ ജമീല ട്രാൻസ്ഫോർമർ പരിധിയിൽ ഭാഗികമായി വൈദ്യുതി മുടങ്ങും
മാടായി ഇലക്ട്രിക്കൽ സെക്ഷനിലെ കാലിക്കൽ, സദ്ദാം റോഡ്, റയിൽവേ ഗ്രൗണ്ട് എന്നീ ഭാഗങ്ങളിൽ നവംബർ 18ന് രാവിലെ എട്ട് മണി മുതൽ വൈകീട്ട് അഞ്ച് വരെ ഭാഗികമായി വൈദ്യുതി മുടങ്ങും.
കാടാച്ചിറ ഇലക്ട്രിക്കൽ സെക്ഷനിലെ ആറ്റടപ്പ സ്കൂൾ ട്രാൻസ്ഫോർമർ പരിധിയിൽ നവംബർ 18ന് രാവിലെ എഴ് മണി മുതൽ 11 വരെയും ആറ്റടപ്പ ഡിസ്പെൻസറി ട്രാൻസ്ഫോർമർ പരിധിയിൽ രാവിലെ 11 മുതൽ ഉച്ചക്ക് 2.30 വരെയും ഭാഗികമായി വൈദ്യുതി മുടങ്ങും.